Mílanó

Sagt hefur verið um borgirnar Róm og Mílanó að Róm geymi hjarta Ítalíu og Mílanó höfuðið. Á miðri sléttu Langbarðalands liggur Mílanó og er tengd með skipaskurðum við árnar Ticino og Pó og vötnin Lago Maggiore og Como vatn. Skipaskurðirnir gerðu kleift að flytja marmara í tonnatali til að byggja hina glæstu dómkirkju.

Dómkirkja Mílanó

Hjarta og miðja Mílanó er við dómkirkjuna. Duomo þykir með fegurstu kirkjum í gotneskum stíl og marmarinn sem hana prýðir á uppruna sinn í Ölpunum. Hægt er að fara upp á þak kirkjunnar — með lyftu eða ganga þröngan steinlagðan hringstiga — og njóta útsýnisins yfir borgina við sólarfall. Mörg hús frá fyrri öldum sýna ýmiss konar stílbrigði og gaman er að rýna í þau í ljósi sögunnar.

Galleria, La Scala og Síðasta kvöldmáltíðin

Galleria Vittorio Emanuele er glæsileg gallerísbygging við hlið dómkirkjunnar — fyrsta bygging Ítala úr gleri og járni, þar má kíkja í hátískuverslanir, fá sér ís og kaffi. La Scala óperuhúsið stendur skammt þar frá. Í gömlu klaustri við Santa Maria delle Grazie er hinn frægi Síðasti kvöldverðurinn eftir Leonardo da Vinci — panta þarf miða með löngum fyrirvara.