Slóvenía – Bled

Slóvenía er land mikillar náttúrufegurðar með háum fjöllum Alpa í norðri, víða eru dalir og undirlendi og syðst liggur landið að Adríahafinu. Það er umlukt löndum til flestra hliða — með Ítalíu í vestri, Austurríki og Ungverjaland í norðri og Króatíu í suðri.

Ljubljana — höfuðborgin

Ljubljana hefur oft verið nefnd litla Prag og ástæðan er borgarmiðja hennar með brúm og fögrum byggingum. Arkitektinn Jože Plečnik er höfundur flestra bygginga í miðbæ Ljubljana eftir að stór hluti borgarinnar hrundi í jarðskjálftum árið 1895. Þrískipta brúin liggur yfir ána Ljubljanicu sem hringar sig um elsta hluta borgarinnar. Kastalinn Ljubljanski Grad stendur efst á hæð — þangað má ganga um þröngar götur eða taka lyftu.

Bled — hin töfrandi perla

Ein af perlum Slóveníu er hið töfrandi Bled vatn sem oft er sagt vera einn fallegasti staður í Evrópu. Það liggur í dal umkringt hæðum og snæviþöktum Ölpum þar sem Triglav tindur teygir sig upp í 2864 metra hæð. Bled er draumaveröld með höllum og villum við bakkana. Í vatninu kúrir lítil eyja með sögufrægri kirkju — hægt er að láta ferja sig yfir og njóta útsýnis upp til fjalla.