Verona

Veróna er ásamt Róm, Flórens og Feneyjum á meðal vinsælustu borga Ítalíu — sögð ein elsta og fegursta borg landsins. Hún er staðsett milli Veneto sléttunnar, Gardavatnsins og Dólómítafjallanna, miðja vegu milli Mílanó og Feneyja. Í borginni er að finna magnaðar minjar frá tímum Rómarveldis og ber hæst hringleikahúsið Arena.

Borg Rómeós og Júlíu

Shakespeare sviðsetti hér nokkur verka sinna — borgin er svo rómantísk að hann valdi Verona sem sögusvið einnar frægustu ástarsögu allra tíma. Sé gengið eftir aðalgötunni Via Mazzini má finna hús Júlíu, "Casa di Giulietta", örfáum metrum síðar. Heimili Capuleti fjölskyldunnar er frá 13. öld og þar eru svalirnar hvar undir Rómeó stóð og flutti sinni heittelskuðu sonnettur. Hægt er að ganga inn í lítinn bakgarð, skoða styttu af Júlíu og mæna upp á svalirnar.

Torgin og Arena

Helstu torg Verona heita Piazza delle Erbe og Piazza Bra. Hringleikahúsið — Arena — hefur í boði tónleika yfir sumartímann og var byggt fyrir um 2000 árum þar sem skylmingaþrælar háðu bardaga sín á milli. Í gegnum borgina rennur áin Adige sem gefur henni aukna fegurð og fallegt er að ganga með bökkum hennar. Göturnar eru tandurhreinar og hátískuverslanirnar standa ein af annarri.